"Le coeur a des raisons que la raison ne connaît pas"
Blaise Pascal
Dende va munchos años, la organización asturiana polos drechos de los gais, llesbianes, bisexuales y transexuales, XEGA (Xente Gai Astur) vien entamando acciones pa que los asturianos y les asturianes pasen penriba la invisibilización que sufren por pertenecer a tendencies sexuales minotaries y que faigan la prueba del VIH pa prevenir contaxos y que puean tener unes condiciones de vida buenes en casu de que'l resultáu nun fuere'l más afayadizu. Cartelos como esti apaecen tolos años nes ocasiones más indicaes pa facese les pruebes, como apelando a los sentimientos pol compañeru o la compañera sentimental el día de los enamoraos. Tamién ye perimporte la publicidá nos díes alreor del primeru d'avientu, el día mundial de la llucha contra'l VIH (virus d'inmunodeficiencia humana). Esta llucha faise siempre con un crespón coloráu, que representa'l so cálter humanista y progresista, poniendo la ciencia médica y el amor sofitaos, a la mesma altura.
El VIH ye un virus qu'acaba coles defenses que tien el cuerpu humanu y que nos protex de les enfermedaes ya infecciones. Desque'l númberu de glóbulos blancos ye menor d'unos estándares, dízse que tamos afectaos de SIDA (Síndrome d'Inmunodeficiencia Adquirida). Pa eso tien que pasar un tiempu ente'l contaxu pol virus y la pérdida considerable de glóbulos blancos. Esti períodu depende de si la persona ta siendo medicada o non, y del gráu de contaxu. El contaxu pue ocurrir por vía sanguínea (tresfusión de sangre sobre too) o sexual, seya oral, vaxinal y, con más peligru, anal. Pa impedilo recomiéndase l'emplegu del preservativu en toles circunstancies. Un error pue convertise nuna deuda pa tola vida, nuna llucha contra'l virus que nun ye nada fácil y que, desgraciadamente, ta mui estigmatizada socialmente. Pola sangre y el semen sí se tresmite'l VIH, pero non pola saliva, onde la concentración de virus nun ye la suficiente y, amás, ye un mediu hostil pal virus, pola acidez. El contautu epidermal y cola saliva, contra tolo que se suel pensar, nun ye contaxoso, y los besos y les caricies puen ser parte fundamental de les rellaciones sexuales ensin problema nengún, lo mesmo que la penetración pero siempre con preservativu.
Desgraciadamente, tovía nun hai cura pal SIDA, nin siquiera vacuna pal VIH, magar de que los medicamentos creaos yá valen pa perdurar la vida en meyores condiciones de los pacientes, y la enfermedá pasó seliquino de se mortal a ser crónica. Lo meyor que se pue facer pa güei ye la prevención, y por ello, si nun s'empleguen les medíes de protección necesaries, ye conveniente facese les pruebes a la mayor brevedá. Son gratuites, discretes y el resultáu ofrezse rápido, aunque pa unos resultaos fiables del too hai que esperar a que pase'l períodu ventana, de 15 díes a 3 meses, ente la relación de riesgu y la prueba. La non discriminación tamién tien que ser una medía escontra la esclusión de cálter fundamental, porque como diz la cita de Pascal, el corazón tien razones que la razón nun conoz. Déxovos cola canción de Mecano "Fallo Positivo" que fala del amor magar de la enfermedá, y como ante la obsesión científico-médica tien que ocupar un llugar fundamental el sentimientu, y l'afectu l'antídotu indispensable, un bálsamu de fierabrás.
Sergio DÍAZ MENÉNDEZ
No hay comentarios:
Publicar un comentario